首页 >车头条 > 内容

MercedesAMG GT 63 S 4MATIC 4 Door Coupé

车头条 2021-03-30 14:19:34

639匹最强街车

Mercedes-AMG GT 63 S 4MATIC+ 4 Door Coupé


今次 <<OpenCar>> 介绍嘅车,新车车价差不多要3百万,我知,介绍啲车唔够贴地呀嘛,我哋有睇到你哋嘅留言。不过有时睇下普通嘢,有时又睇下高级嘢,咁先够过瘾㗎嘛!言归正传,今次我哋借咗 Mercedes 最强街车过嚟,全名就係Mercedes-AMG GT 63 S 4MATIC+ 4 Door Coupé,由于个名实在太长,请容许我以4门GT呢个简称嚟叫佢,呢部4门GT大有来头,因为佢係继SLS AMG 同 AMG GT Coupé ,第三部由 Mercedes-AMG 亲自打理嘅车款。


Mercedes-AMG GT 63 S 4MATIC+ 4 Door Coupé 第三部由 Mercedes-AMG 亲自打理嘅车款,不过新车价就唔太亲民接近要300万。


车厢入面

一坐上车,首先会见到个好有型嘅AMG Performance軚盘,佢除咗有好多锺意改车嘅车主都渴望想要嘅猄皮軚环之外,右下角仲会有一个圆形控制器,佢可以用嚟显示同选择4门GT 6种唔同嘅驾驶模式。另外喺左下角嘅两个按钮,可以随车主嘅喜好设定按钮所控制的功能,例如调节避震嘅软硬度、尾喉气阀开关等等。比较以前 Mercedes 车款要喺中控先选择到驾驶模式方便快捷咗好多。最后,軚盘上面左右两边有两个黑色嘅按钮,可以控制中间两个12.3 吋嘅电子錶板同中控显示屏。


4门GT嘅中控台设计其实大有来头,佢嘅设计係对应返车头副V8引擎,所以会係V字形又会有8个选择按钮,不过事实上 GT 车款都有用到呢个设计,不过4门GT嘅设计就更新咗,喺每个按钮上面有一个细细嘅显示器,话你知调校紧边样嘅设定。


除咗有好多较为高级车都有嘅气氛灯之外,4门GT嘅冷气出风位都有嘢玩,将冷气温度调高嘅时候,出风位嘅气氛灯会转成红色。


相反,冷气温度调低嘅时候就会变成蓝色,呢啲细节位部车都有照顾到。


至于呢部车嘅卖点,后座坐落去嘅感觉如何呢?虽然只得两张櫈,坐落去都有少少似坐着赛车櫈嘅感觉,而头顶空间大概有一个拳头嘅空间,当调较好我嘅驾驶座姿之后,膝头同前座之间大概有两个半拳头嘅空间,后座空间相当唔错。车尾箱嘅容量有 395 L,行李箱底板下还有额外的 60 升容量。


后座座位坐上去有少少桶櫈感觉,坐得都几舒服。


引擎入面嘅配备

其实4门GT 使用嘅4.0 公升 V8 Twin Turbo 引擎喺好多Mercedes 嘅车款都有出现,包括 C E S G Class嘅 63 或者 63S,不过喺众多嘅型号入面,呢部车拥有最大马力输出 639匹,峰值扭力900Nm,0-100 公里/小时加速3.2秒,极速更加係有315公里/小时。


呢副4公升 V8 Twin Turbo 机器喺 Mercedes 唔同嘅车款已经出现过好多次,不过嚟到4门GT 就有暂时最强劲嘅设定(街车计)。


两个双涡旋排气涡轮增压器

用得Turbo 引擎,难免会有Turbo Lag 嘅问题,为咗减底Turbo Lag 4门GT 用咗两个双涡旋排气涡轮增压器(Twin Scroll Turbo),用双涡旋技术之后好处係可以确保排气流量可得到最好嘅利用从而提高动力输出同扭力。


Drift mode甩尾模式

4门GT 车入面总共有6个行车模式:包括「Slippery」、「Individual」「Comfort」、「Sport」、「Sport+」同「RACE」。好似打机咁有个秘技玩,可以开启一个隐藏Mode- Drift Mode(甩尾模式)出嚟,令部车由四驱变成尾辘车。


智能 AMG 汽缸管理系统

除咗上面提过嘅两个双涡旋排气涡轮增压器之外,车入面仲有一个智能 AMG 汽缸管理系统,当使用「Comfort」驾驶模式嘅时候,而引擎转速又喺1,000 至 3,250 之间,8 个汽缸入面嘅 2、3、5 同8 号汽缸就会停用,从而降低燃料嘅消耗。不过我个人认为买得起部新车价超过300万、同时马力又超过 600 匹嘅车,好似冇咩理由要悭住用油喎。


车出面除咗套20吋軨,仲有个AMG独家嘅鬼面罩,而鬼面罩下面有一个主动式扰流装置AIRPANEL,有需要嘅时间会打开,等更多空气进入引擎,不过如果要降低风阻都可以闩返。


当日试嘅车加咗AMG Exterior Carbon package I同埋AMG Exterior Carbon-Fibre package II,车外加咗碳纤饰件,好似车头铲同埋大大只嘅尾翼等等,令部车睇落更恶,而呢两个option 加埋已经接近20万,所以总车价佢已经差唔多320万。


行车表现

试车之后,会发觉呢部4门GT Turbo Lag嘅情况唔明显,相信因为佢用咗双涡流增压器,所以已经将Turbo Lag 减到好低。至于动力输出方面大约3,000转左右动力依然非常充足,再加上AMG Speedshift 9G 9速波箱,除咗波段向上时候加速力非常强劲之外,掉转Downshift时,波箱反应都係极之迅速,绝对唔会有拖泥带水嘅感觉。


之前曾经都试驾过Mercedes 其他车款,特别是一些比较入门级嘅车款,例如C200 等等,軚感畀我嘅感觉比较轻。虽然4门GT 车长5米又重超过两吨,但係軚感都好实在以及过弯亦都好灵活。4门GT同 AMG GT Coupé 最大分别就係前者係尾驱车而后者就係部四驱车,四驱好处大家都应该会知道,落雨湿地时抓地力更好、而出弯动力输出比起尾驱车更早,最后就係四驱行车可以令安全性提高。


我自己係靓喉声嘅追随者,4门 GT 就係出自AMG,而AMG车其中一个卖点正正就係喉声,结果当然冇令我失望,够晒强劲,当鬆开油门嘅时间仲会有打炮声添!


如果一定要喺鸡蛋入面挑骨头的话,我会话张Performance Seat,虽然佢将我紧紧咁包着,高速过弯时候唔会令我左摇右摆,不过佢嘅质料真係很硬,坐得太耐有几会条腰会痛。 


好老实讲,4门GT 有639 匹,喺合法嘅情况下真係用唔晒,再加上试车当日天气不似预期。不过喺咁有限嘅条件之下试过呢部车,而佢都可以带畀我非常强烈嘅感觉。如果有机会可以带佢落赛车场的话,相信呢部Mercedes-AMG GT 63S 4MATIC+ 4 Door Coupé一定可以好好玩。


Mercedes-AMG GT 63S 4MATIC+ 4 Door Coupé 规格

引擎:3,982c.c.V8 twin turbo

马力:639hp/5,500 - 6,500rpm

扭力:900Nm/2,500 - 4,500rpm

传动:AMG SPEEDSHIFT MCT 9G

车身:5,054 X 1,953 X 1,442(mm)

轴距:2,890mm

重量:2,951 kg

0-100km/h加速:3.2秒

极速:315 km/h

车价:$2,998,000起

查询:仁孚行(2895 7339)


Text: Daniel

Photo: Billy

郑重声明:本文版权归原作者所有,转载文章仅为传播更多信息之目的,如作者信息标记有误,请第一时候联系我们修改或删除,多谢。