首页 >车头条 > 内容

最细Lexus SUV

车头条 2021-03-29 14:22:12

全新入门级Crossover SUV UX200 F Sport

Lexus UX200 F Sport


今次我哋试嘅UX200係Lexus全新入门级Crossover SUV,新车喺将会有两部版本发售,分别係电油版UX200(细分3个版本:UX200 Superior、UX200 Ultimate同 UX200 F Sport)同混能版UX250h,新车价由$319,900起,我哋率先试嘅UX200 F-Sport就要$425,950。


呢部UX真係乜都係全新,新嘅车系、新嘅引擎、新嘅波箱同新嘅底盘,依家逐一同你数清楚。


新两公升引擎

UX200用嘅係两公升直四NA(自然吸气)引擎,最大马力有173匹、峰值扭力有204Nm。厂方喺新引擎进气位置进行咗多方面改良,同时将压缩比提升到13:1 ,仲用埋缸内直喷等技术。所以,厂方话呢副新引擎係市场上最有效率嘅引擎,既保持到效能亦可以悭油,配合改良版Direct Shift-CVT模拟10前速自动波箱,新车0-100km/h加速时间9.2秒。


UX200採用两公升直四VVT-i引擎,虽然冇Turbo,但低、中转表现唔差。


新Direct Shift-CVT波箱

改良后嘅波箱同普通CVT波箱有咩分别?如果试过普通CVT波箱嘅车迷都会知道佢嘅问题,就係畀大油一刻会出现「有声冇画」情况,即係部车好似要等一等先识行,Lexus就针对呢个问题改良咗UX200波箱,希望令驾驶感变得更加直接,咁到底有冇改善咗呢?试车当日我即场做咗实测,试过喺车辆静止时尽油加速,又试过行紧50km/h时突然加大油门角度,新波箱反应都比旧式CVT波箱实在,反应仲好贴近传统自动波箱。


UX代表Urban X-over,新车定位係方便买家喺城市用,佢嘅最小迴旋半径只得5.2米。


新GAC底盘

新引擎、新波箱,另一样新嘅就係GAC底盘,UX200係Lexus第一部用呢个底盘车款,卖点係轻得嚟又够硬净、而且低重心设计令UX过弯时更加稳定同灵活。


UX200虽然係一部SUV,但车身重心偏低,所以过弯可以好灵活。


F Sport版合共有4个行车模式,包括ECO、Normal、Sport S同Sport S+。


试车短评

UX200用嘅173匹引擎,马力输出当然唔及得同级对手嘅Turbo引擎咁澎湃!不过以两公升NA引擎计,佢低中转扭力都算充足。如果你想佢反应再快啲,F Sport版仲多咗个Sport +模式,转用呢个模式之后加速反应会更加快。

驾驶感方面,UX200虽然係SUV,但佢重心唔高,加上F Sport版独家嘅运动化避震机有好好承托力,转弯时车身唔会左摇右摆,稳定性绝对唔会输畀其他同级对手。不过,呢套避震机对比Lexus其他车款嚟讲就硬身少少,所以坐落去感觉会冇咁舒服。


UX200驾驶感似揭背车,拐弯抹角性能卓越。


42万F Sport版本

讲完一大轮有关引擎同波箱嘅资料,不如讲下要加多10万嘅F Sport 版有几巴闭?首先UX200 F Sport车身有专用包围外,仲有Multi LED头灯同比基本版大1吋嘅18吋合金軨。内笼方面全车嘅櫈同门板都包晒F Sport真皮,有真皮軚盘连转波拨片、10.3吋中控台mon.、 彩色Head-up Display、脚踢感应电动尾门、全车13个Mark Levinson喇叭同灵感嚟自LFA嘅电子錶板。除咗视觉上有分别之外, F Sport版仲比基本版多咗套专用避震机。不过,F Sport Package要加成10万,大家都可能要考虑下!

UX200车尾设计,係我觉得全车最型仔地方,佢用咗近年大热「一字形」尾灯设计,好似Audi、Porsche都用紧呢个设计。但你唔好以为佢个车尾净係得个「型」字,好似佢突起嘅尾灯部分,其实係有导流作用,所以UX200车身风阻系数只有0.33。


车尾灯由120粒LED灯组成,「一条过」式尾灯设计非常抢眼。


车厢空间

喺试全新UX200之后,我已经知道部车后座空间唔大,当前座调校到我合适坐姿(身高5尺8吋)时,膝头同前座大概有一个拳头位空间,头顶空间就大约半个拳头位,压迫感虽然有,但空间仍然算係合理。


由于UX200车身唔大,所以后座空间都要作出少少牺牲。


同级对手

UX200 F Sport喺市场上主要对手,分别有BMW X1 sDrive20iA(192hp)同Audi Q3 35 TFSI quattro Sport(180hp),三款车车价都係约40万。係!UX200马力输出唔及佢哋,但揸车又唔係一味讲马力,仲有其他因素要考虑嘅,例如油耗、设计靓唔靓同豪唔豪等。再畀多少少资料大家,厂方公布UX200耗油量5.8L/100km,畀两个对手稍为悭油少少啦。咁都未说服唔到你买?仲嫌贵?不妨考虑30几万嘅基本版UX200。


试车当日行经龙翔道一段,个人认为UX200比起Lexus其他车款嘈少少。


车厢入面有真皮軚盘连转波拨片同10.3吋中控台mon.,用料绝对唔马虎。


F Sport真皮櫈嘅乘坐感,支撑力够之余仲好舒服。


F Sport独有Multi LED头灯同跑车包围,相比普通版型仔好多。


UX200 F Sport 有比基本版大1吋嘅18吋合金軨。


全新试车方式

如果你曾经买过车就会知道,试车通常都係会围绕住Show Room果几条路线嚟行,试完车就完咗件事,有时谂返起其实都几闷。有见及此,Lexus Hong Kong由1月19日起至4月中会推出一个全新试车方式,畀一众準买家试下Lexus旗下全新UX车款。呢次试车活动会用到数据分析软件再透过连接社交媒体帐户,利用大数据分析你行为模式、生活偏好同日常习惯,最后度身订造一条独一无二试车路线畀你。

例如佢会建议你由Lexus九龙湾旗舰店出发去做个SPA;又例如由大坑Classified 餐厅去铜锣湾玩下咖啡拉花,试部UX之余又可以享受下生活。完成试车之后仲可以获得UX体验VIP card一张,可以喺超过20间商户用到呢张卡嘅优惠!



UX200 F Sport

引擎:1,987c.c.直四

马力:173ps/6,600rpm

扭力:204Nm/4,400-4,800rpm

传动:Direct Shift-CVT

车身:4,495 x 1,840 x 1,520(mm)

轴距:2,640mm

车价:$425,950起

查询:皇冠车行(2820 4020)


Text:Daniel

Photo:Lam Tsz Cham

郑重声明:本文版权归原作者所有,转载文章仅为传播更多信息之目的,如作者信息标记有误,请第一时候联系我们修改或删除,多谢。